БИШКЕК, 15-окт. — Sputnik. Москвада мекендештерин сабап, тоногон уюшкан кылмыштуу топтун мүчөлөрү кармалды. Алар Кыргызстанда туулган. Бул тууралуу КР ИИМинен маалымдашты.
Кармалгандар менен жабыркагандар таксомотордук фирмада иштешкен. Акчасын алдыргандар полицияга арыз жазуудан коркуп жүрүшкөн. ИИМден билдиришкендей, уюшкан кылмыштуу топтун мүчөлөрү өздөрүн Камчы Көлбаевдин тобундагы адам катары тааныштырып келишкен.
"КР ИИМинин Россиядагы өкүлчүлүгүнө белгисиз адамдар Москва шаары менен Москва облусунда Көлбаевдин атын жамынып мекендештерин сабап, тоноп жүргөн адамдар боюнча бир нече ирет маалымат келип түшкөн. Үстүбүздөгү жылдын июль айында аларга укук коргоо органдары тарабынан "күч колдонуу менен тоноо" беренеси боюнча кылмыш иши козголгон", — деп айтылат маалыматта.
Аларга карата кылмыш иштери козголгон бирок баш коргоо чарасына ылайык эркиндикте калып, тоноочулук ишин улантышкан. Кийинчерээк жабыркагандардын бири кылмышкерлер аны тапанча менен коркутканын айтып берген.
"Жабырлануучу унаасын сатып Кыргызстандан Москвага келген. Ал таксомотордук паркка расмий келишими жок ишке орношуп ошол жактан Аскар жана Мадияр деген балдар менен таанышкан. Алар августтун башында жабырлануучуну коркутуп 1600 долларын, паспортун, телефонун жана башка баалуу буюмдарын тартып алган", — деп ИИМден билдиришти.
Аскар менен Мадияр ал жаранды токойго алып барып таксисттердин көзүнчө сабап, башкалар баш ийбесе аларды да ушундай тагдыр күтүп турганын айтышкан.
Учурда колго түшүрүлгөндөр убактылуу кармоочу жайга киргизилди. Эми документтердин ээлерин табуу иштери аткарылууда. Ошондой эле уюшкан кылмыштуу топтун мүчөлөрүнүн дагы башка иштерге тийштиги бар-жогу иликтенип жатат.