БИШКЕК, 14-окт. — Sputnik. Россиялык ММА мушкери, UFC уюмунун жеңил салмактагы чемпиону Хабиб Нурмагомедов америкалык Флойд Мейвезерди рингде күч сынашууга чакырды. Бул туурасында менеджер Деджуан Блэйк Instagram баракчасына жүктөгөн.
Анда Нурмагомедов боксчу Мейвезерге видео кайрылуу жасап, ал экөө тең жеңилбес спортчу экендигин белгилеген.
"Эмнеге мүмкүн болбосун? Жунглиде бир падыша бар. Ал, албетте, мен", — деген Хабиб.
Былтыр августта Лас-Вегаста өткөн бокс боюнча мелдеште Мейвезер ирландиялык Конор Макгрегорду техникалык нокаут менен утуп алган болчу.
Нурмагомедов болсо 6-октябрда UFC 229 турниририн алкагында Макгрегорду утуп, наамын коргоп калган.