БИШКЕК, 2-окт. — Sputnik. ММА беттештеринин тарыхында маанай көтөргөн кармаштардын бири орун алды. Атап айтканда оор салмакта беттешке чыккан мушкерлер аябай чарчагандыктан үчүнчү раундда кол көтөрүүгө дарманы келбей калды.
Беттеш Япониянын Сайтама шаарында болуп, 150 килограмм салмакка чейинки категорияда америкалык рестлер Боб Сапп менен египеттик сумоист Осунаараси Кинтаро беттешкен. Алар үчүн да өзгөчө эреже киргизилип, мушкерлер үч мүнөттөн үч раунд кармашышы керек болчу.
Биринчи, экинчи раундда атаандаштар жакшы эле мушташып, үчүнчү раундда катуу чарчагандыктан колун көтөрүүгө дарманы келбей, рингдин ичинде ары-бери эле басып, көз караш менен гана "мушташышкан".
Жыйынтыгында калыстардын чечими менен жеңиш бир добуштан америкалык мушкерге ыйгарылды.