БИШКЕК, 30-сен. — Sputnik. Астана шаарындагы көп кабаттуу үйлөрдүн биринин бешинчи кабатында терезенин кырын кармап турган кишинин видеосунун чоо-жайы аныкталганын Tengrinews порталы жазды.
Окуя 29-сентябрда болгон.
Бешинчи кабатта асылып турган киши тууралуу билдирүү полицияга саат 16:00дөр чамасында келген. Окуя болгон жерге келген укук коргоо органдарынын кызматкерлери кишини асылып турган жеринен батирдин ичин көздөй тартып алышкан. Аны аялы менен чогуу окуянын чоо-жайын аныктоо үчүн полиция бөлүмүнө алып барышкан. Сурак учурунда аныкталгандай үй-бүлөлүк чырдан улам күйөөсү аялынан сыртка чыгарууну сурап, ал көнбөгөндө терезеге чыгып алган.
Жубайларга түшүндүрүү иштери жүргүзүлүп, киши медициналык кароодон өтүү үчүн психиатриялык ооруканага алып келинген.