"Россиядагы кыргыздар" десе эле эртеден кечке кара жумуштан башын көтөрбөй, же бир бөлмөдө тобу менен жашаган адамдар көз алдыңа тартылат. Болбосо кайсы бир чуулу окуянын үстүндө жүргөндөрдү элестетсеңер жаңыласыңар деп айтты эле бир досум. Чынында эле Москвадан баар таап, россиялыктар менен тең тайлаша ийгилик жаратып жүргөн кыргыздар да бар. Ошондойлордун бири — Чыңгыз Калбердиев менен болгон маекти сунуштайбыз.
— Канча жылдан бери Москвада жүрөсүз?
— Россия киносуна кантип аралашып калдыңыз. Катардагы мигрантты бул жолго ким түртмөлөгөн?
— 2014-жылы "Кыргызстан" деген павильондун директору Кубаныч Кожоев базарга келгендерди тартып турасың деп ишке алган. Ошол жерде жүрсөм мигрант кыздын тагдыры жөнүндөгү "Айка" тасмасына кастинг өткөргөнү келишти. Ага катышып өтүп кеттим. Кыргызстандан келип 10-15 адам бир бөлмөдө кыйналып жашаган мигранттын эпизоддук ролун жараткам. Ал чыгармачыл топко төрт жылдан бери аралашып жүрүп режиссеру менен дос сыяктуу болуп калдык. Эки ай мурда тасманын дубляждарын бүтүштү. Ошол тасма аркылуу мага башка кинолорго жол ачылды.
— Андан башка дагы кандай тасмага тартылдыңыз?
— Чынын айтканда санап көрбөптүрмүн, эсимден деле чыгып калды. Жалпылап айтканда 50гө чукул тасмага тартылдым окшойт. "Вратарь Галактика" деген кинодо кытайдын ролун жараттым. "Отель Элион" сериалынын быйылкы сезонунда дагы бир эпизодунда кытай болдум. Өзүм кыргыз болгонум менен кыргыздын ролун аз ойнойм. Көбүнчө кытай, япон, вьетнамдын ролун берип коюшат.
— Россиянын кино тармагы кандай экен, сиздин гонорарыңыз канча?
— Мен кызмат акым үчүн бир баа койгон эмесмин. Роль барбы, типажы туура келеби баш тартпайм. Сунуштаган акчасына макул болуп катыша берем. Кээде бекер түшүп берип койгон учурлар да болот. Кыска эпизоддор 1500-2000 рубль, алды 20 миңге чейин. Жарнамалык роликтерге кымбатыраак төлөйт. Мисалы "Золотая Корона" төлөм системасынын жарнамасына бир күн тартылып 30 миң рубль алгам. Жакында эле автоунаа саткан компаниянын ролигине 20 миң рубль төлөштү.
Ал эми "Айка" тасмасын тартканда 5 ай иштеп 70 миң рубль таптым. Күнүгө барып өзүмдүн ролумдан сырткары сүрөтчүгө жардамчы, оператордук курамдын айдоочусу болдум. Ал убакта мени акча эмес, кино тармагына аралашуу көбүрөөк кызыктырчу. Кийин иштер чыгып Кыргызстанга келип, тартуу учурунда гана барып калдым.
Азыр бир жерде туруктуу иштебейм. Студиянын иши, кинолордон бошобойм. Башка иштерге деле моюн жар бербей калды. Иштеген учурда деле киного чакырып калышса чыга албай каласың.
— Киного тартылуу учурунда кандай кызыктуу окуялар болот?
— Ачыгын айтканда кино учурунда анча деле кызыктуу окуялар боло бербейт. Ага караганда кыргыздын тойлорунан кызыктарды көп көрөм. Канчалаган кастингдерге барам кээде режиссерлор капа кылып коёт. Мисалы бүгүн тартыла турган кинодо 1980-жылдагы кыргыз бандасынын ана башчысы болосуң деген болчу. Мага да жагып аткан. Азыр башка ролго алмаштырып коюптур барсамбы, же жөн эле койсомбу деп ойлонуп отурам. Атактуу актерлор менен аралашып эле жүрөбүз. Мекендешибиз Алайбек Тойчубеков менен да таанышпыз, ал 60га жакын киного тартылган. Былтыр Федор Бондарчук менен, "Отель Элеондо" баш каармандар менен катарлаш эле жүрдүк.
Той бүткөндөн кийин колуктусу качып кеткен эки окуяны көрдүм. Кадимкидей эле үлпөт той болуп мен видео тартып бергем. Кийин күйөө балага чалсам албайт, эптеп байланышка чыксам кыз тойдон кийин эле качып кеткен десе болобу. Анын себебин да түшүнгөн жокмун. Акчамды да ала албай отуруп калдым.
— Ар бир атуулга мекенге качан кайтасыз деген суроо берилет эмеспи. Буга сиз кандай жооп берер элеңиз?
— Барып бир телевидениеге кирип алып иштесем дейм. Бирок артка жол жок болуп калды. Азырынча бул жакта жумуш жакшы болуп жатканда иштей бериш керек. Анын үстүнө келинчегим Россиянын жараны, жаш балабыз бар. Аларды да карап багыш керек да. Өзүм Кыргызстандын эле жаранымын. Кээде айрым ролдорго катышаарда Россиянын жарандыгын талап кылып, баш тарткан учурлар кездешет. Ошондо бир аз ойлонуп калам…
— Келинчегиңиз кыргыз элеби?
— Ооба кыргыздын эле кызы, Оштун Алай районунда төрөлгөн. Болгону ата-энесинин жумушуна байланыштуу бул жакта чоңоюп калган. Эки жыл мурда баш кошконбуз. Учурда келинчегим тун уулубузду төрөп, азыр үйдө.
— Сиздин ата-энеңиз каякта турат?
— Биз бир туугандар төрт уул, бир кызбыз. Атам 12 жыл мурда каза болуп калган. Апам бир иним менен азыр Бишкекте турат. Калган бир туугандарым Москвада иштешет.
— Келечекте кандай пландарыңыз бар?
— Аябай чоң пландар бар, эми ошолорду ишке ашырууну Кудайым насип кылсын! Өзүм режиссерлук кылып кино тартсам дейм. Башкысы мен эңсеген нерселер акырындык менен орундалып жатат. Кыялдардын ишке ашуусуна ишенсе болот экен.