БИШКЕК, 28-сен. — Sputnik. Казакстанда журналист Ирина Бекетованы өлтүрдү деп шектелген киши кармалды. Бул тууралуу Sputnik Казакстан агенттиги билдирди.
Журналисттин сөөгү өзү жашаган үйдүн короосунан табылган. Аны менен чогуу жашаган киши журналистти өлтүргөн деген шек менен издөөгө алынган.
Астананын 34 жаштагы жашоочусу Анатолий Гусейнов Акмола облусунун Аршалы районунун Ижевск айылындагы Есиль дарыясынын жээгиндеги кароосуз калган имаратта жашынып жүргөн.
ИИМдин маалыматы боюнча операция аябай ыкчам болгондуктан шектүү киши эч кандай каршылык көрсөтүп, же качып кетүүгө үлгүргөн эмес.
Гусейнов убактылуу кармоо жайына киргизилди.
Маркум менен шектүү расмий үйлөнгөн эмес, бирок эки баласы болгон. Буга чейин маалымдалгандай, журналист төрт баланы тарбиялап келген. Балдарынын бири майып экени айтылган. Учурда тергөө амалдары жүрүүдө.