БИШКЕК, 20-сен. — Sputnik. Өлкөнүн түштүк аймагында сууга чөгүп кеткен эки өспүрүмдүн сөөгү табылды. Бул тууралуу ӨКМдин маалымат кызматынан кабарлашты.
Каргашалуу окуялардын бири 18-сентябрь күнү саат 18.30дар чамасында Аксы районунун Кум айылында болгон. Анда 12 жаштагы окуучу мал кайтарып жүрүп Нарын дарыясына түшүп, агып кеткен.
Экинчи кырсык Ош облусунун Чалма айылында катталган. 29-август күнү Тар дарыясына чөгүп кеткен сегиз жашар баланы ӨКМдин куткаруучулары менен жакындары 20 күндөй издешкен.
Экөөнүн тең сөөгүн 19-сентябрь күнү куткаруучулар аталган дарыялардан таап, жакындарына өткөрүп беришти.