БИШКЕК, 18-сен. — Sputnik. Жогорку соттун судьялыгына сунушталган шаардык соттун судьясы Жаңыл Мамбеталынын талапкерлигин Жогорку Кеңештин Конституциялык мыйзамдар, мамлекеттик түзүлүш, сот-укук маселелери жана парламенттин регламенти комитети колдоп, ЖКнын жалпы отурумунун кароосуна жөнөттү.
Депутат "далилдер жетиштүү болгонбу?" деп суроо салганда, Жаңыл Мамбеталы бул окуя боюнча документтер 5-6 иш болуп бөлүнүп келгенин, сот коллегиясы Садыр Жапаровдун ишин карап, райондук соттун өкүмүн өзгөртүүсүз калтырганын белгиледи.
Ал эми Масалиев соттун чечиминде саясат жыттанып жатканы даана көрүнүп турганын айтып, "ушундай өкүм чыгар" деп ким буйрук бергенин сурады. Жаңыл Мамбеталы өз учурунда эч кандай буйрук берилбегенин айтып ишендирди.
"Жеке пикиримде сиз чоң ката кетирдиңиз, убакыт өткөн сайын мындай чечимдердин кайтып келе турган адаты бар, жакшы эмес", — деди депутат.
Белгилей кетсек, 2013-жылы Бектур Маматаиров экономикалык кылмыштуулукка каршы күрөшүү мамлекеттик кызматынын тергөөчүсү болуп турганда пара талап кылган деген шек менен УКМКнын коррупцияга каршы күрөшүү кызматы тарабынан кармалган. Маалыматка ылайык, ал жеке ишкерден кылмыш жоопкерчилигине тартылбайсың деп 6 миң доллар талап кылган. Ага карата Кылмыш жаза кодексинин 313-беренеси ("Опузалап пара талап кылуу") боюнча кылмыш иши козголгон.