БИШКЕК, 17-сен. — Sputnik. Бишкектин Чыгыш-5 кичирайонунун аймагындагы Чүй проспектисинин жолун оңдоо иштери мажбур болгон тыныгуудан улам 15-сентябрда ачылбай калды. Бул тууралуу Бишкек мэриясынын капиталдык курулуш башкармалыгы билдирди.
Буга чейин аталган мекеменин башчысы Нурлан Эшенбаев жолду оңдоо иштери 15-сентябрга чейин аяктай турганын айткан болчу.
Маалыматка ылайык, Чүй проспектисинин 7-Апрель менен Төрөкул Айтматов көчөлөрүнүн ортосундагы бөлүгүн оңдоо иштери айрым курулуш материалдардын убагында келбегенинен улам создуктурулган. Өзгөчө битумду алып келүү кечеңдеген.
Учурда асфальт төшөлүп, иш толугу менен 25-сентябрда бүтө турганы маалымдалды.