БИШКЕК, 11-сен. — Sputnik. Сооронбай Жээнбеков бүгүн, 11-сентябрда, өлкөнүн билим берүү жана илим министри Гүлмира Кудайбердиеваны кабыл алды. Бул тууралуу президенттин маалымат кызматынан кабарлашты.
Мамлекет башчы коомчулукта мектептердин жетишсиздиги боюнча нааразычылыктар болуп жатканын белгилеп өткөн.
"Талдоо көрсөткөндөй, айрым мектептерде окуучулар көп, кээ бирлеринде аз болуп жатат. Ата-энелер сапаттуу мектептерге балдарын алып барууга аракет жасайт. Мындан улам башка мектептерде окуучулар аз болууда. Бул көрүнүш билим берүү системасына реформа керек экенин айгинелеп турат", — деди Жээнбеков.
"Мектептерди курууга финансы жетиштүү. Коррупциядан түшүп жаткан каражаттар бар, аларга атайын эсеп ачылган. Ошол акчаларга Бишкек шаарында жана аймактарда мектеп куралы", — деди президент.
Ал эми Кудайбердиева жалпы билим берүү мекемелеринин мугалимдер менен камсыз болушу жана билим берүү сапаты боюнча анализдин алгачкы жыйынтыктарын көрсөтүп берген.
Ошондой эле маалыматта республика боюнча учурда 149 жаңы мектеп курулуп жатканы, 2018-жылдын аягына чейин 78 мектеп колдонууга берилери көрсөтүлгөн.