Бүгүн, 6-сентябрда Кырчын жайлоосундагы этношаарча өз ишин токтотуп, Көчмөндөр оюндарына арналган маданий иш-чаралар жыйынтыкталды. Төрт күн бою бул жерге миңдеген адамдар келип кыргыздын тарыхы, үрп-адаты, маданияты жана ажайып жаратылышы менен жеринен тааныша алды.
Кең жайыкка миңден ашуун боз үй тигилип эски заманды эске салган кыргыз айылы түзүлдү. Өлкөнүн облус, шаарлары жана коомдук уюмдары өз ордосун курду. Бул жерде күн сайын түрдүү оюн-зооктор өтүп жатты. Кимде-ким кыргыздардын же көчмөндөрдүн жашоо-турмушун тереңден билгиси келсе Кырчынга ат бастырып келиши керек эле.
Бир эле мисал этношаарчанын ачылышы аземинде "Көчмөндөрдүн алтын доору” аттуу театрлаштырылган оюн-зоок коюлуп, 1400 өнөрпоз кыргыздардын кадимки турмушунан катылган душмандын катыгын бергенине чейин көрсөттү. Ошондой эле жаш жигит Союзбек Надырбеков чыныгы жашоодогу сүйүктүүсүнө баш кошуп XIX кылымдагы салт менен үлпөт тоюн өткөрдү.