БИШКЕК, 6-сен. — Sputnik. Кырчын жайлоосунда өтүп жаткан жаа атуу боюнча кыз-келиндер арасындагы мелдешке Кыргызстан, Казакстан, Кытай, Монголия, АКШ, Түркия жана Венгрия өлкөсүнөн келген 11 кыз-келин катышканын Салбурун федерациясынын президенти Алмаз Акун билдирди.
Алардын арасынан монгол кызы Конгорзул Батбаатарды кезиктирүүгө болот. Анын жаа атканы эле эмес, ажарлуу жүзү да көрүчүүлөрдү суктантты. Мелдештин соңунда Sputnik Кыргызстан агенттигинин кабарчысы ошол жаачы кызды кепке тартып баарлаша алды.
Хонгорзул 20 жашта, быйыл Кыргызстанга биринчи жолу келип жатат. Ага тоо койнунда өтүп жаткан оюндар жаркын маанай тартуулаганын белгиледи.
"Ассолому алейкум, мен Монголиянын борбору Улан-Батордон келдим. Көчмөндөр оюндарында атчан жаа атууга катышып турганыма абдан кубанычтамын. Аны уюштурган кыргыз элине чоң рахмат. Биз жакта да ушундай жаа атуу оюндары тынымсыз өтөт. Мындай иш-чаралардын дагы да көп болушун тилейбиз. Мен дайым катышууга дилгирленем. Бул сыяктуу оюндардын Монголияда дагы өтүшүн каалайм", — деди жаачы кыз.
Ал Көчмөндөр оюндары тууралуу Монголиянын ат оюндары федерациясы аркылуу угуп келген.
"Монголиянын жаачы кыздарынан жалгыз өзүм келдим. Эки агам коштоп жүрөт. Ажайып оюндарга күбө болуп жатам. Биз жакта да жаа аткан кыздар көп, буюрса кийинки оюндарга көбүрөөк курам менен келүүнү пландап жатабыз. Өзүм ат үстүндө жаа атуу менен алектенгениме 6 жыл болду. Үй-бүлөмдө жаага кызыгып, ойногондор болгон эмес. Мен эле бала кезден атка жакын болдум, кийин жаа атууга кызыгып кеттим", — деди монголиялык Батбаатар.
Ошондой эле ал Кыргызстандын жаратылышы, меймандостугу жакшы экенине токтолуп, бирок уюштуруу жагы бир аз купулуна толбой турганын белгиледи.
"Уюштуруучулар тарабынан бир аз кемичиликтер болуп жатат. Кыргызстандык кыздарга жакшы аттарды мингизип, бизге чабалыраактарын беришүүдө. Жакшы чуркабай калып жатат. Албетте, мындай оюндар бизге чоочун эмес. Монголияда дагы ушул сыяктуу чоң тойлор өтүп жаа атуу, ат чабыш, монгол боx жана эр сайыштар болуп турат", — деди Батбаатар.
Көчмөндөрдүн дүйнөлүк III оюндары 8-сентябрга чейин уланат. Спорттук мелдештерге 70 мамлекеттен (Россиянын 12 субъектиси) 1918 спортчу катышууда. Алар спорттун 37 түрү боюнча күч сынашат.