БИШКЕК, 3-сен. — Sputnik. Бүгүнкү мелдешке чыкпай калган Казакстандын көк бөрү боюнча курама командасынын тагдырын калыстар чечет. Бул тууралуу Sputnik агенттигине ДКОнун уюштуруу комитетинен билдиришти.
Маалыматка ылайык, Көчмөндөр оюндарынын экинчи күнүндөгү мелдештер аяктаган соң калыстар чогулуп аталган маселени карап чыгышат.
Бул боюнча Казакстандын маданият министрлиги оюнга катышпоо чечимин эч ким кабыл албагандыгын жана спортчулар мелдештин программасынын негизинде бардык оюндарга катыша тургандыгын кабарлашууда.
3-сентябрдагы оюндарда өзбекстандык оюнчулар Башкортостанды 20:1, Кыргызстандын улуттук курама командасы монголдорду 29:5 эсебинде жеңип алды.
Көк бөрүнү ойноо тартиби менен Sputnik Кыргызстан агенттигинин материалынан таанышыңыздар.