ЧОЛПОН-АТА, 2-сен. — Sputnik. Көчмөндөр оюндарына катышуу үчүн 66 өлкөнүн жана Россиянын 11 субъектисинен 1556 спортчу келип каттоодон өттү. Бул туурасында Жаштар иши, дене тарбия жана спорт агенттигинин директору Канат Аманкулов журналисттерге билдирди.
Маалыматка ылайык, жалпы жонунан 82 өлкөдөн 2500 спортчу электрондук каттоодон өткөн.
"Акыркы сааттарга алынган маалымат боюнча 66 мамлекеттин спорттук делегациясы келди. Калгандары дагы келип жатат. Спорттук мелдештер Чолпон-Атадагы ипподромдо, Ден соолуктуу чыңдоо борборунда, Евразия пансионатында жана "Кырчын" жайлоосунда өтөт. Айрым мелдештер бүгүн эртең менен башталган", — деди Аманкулов.
Ошондой эле ал спортчулардын саны боюнча Кыргызстан, Казакстан, Өзбекстан жана Россия мамлекеттери сап башында экенин кошумалады.
Көчмөндөрдүн дүйнөлүк III оюндарында 594 медаль ойнотулат. Анын ичинен алтын — 174, күмүш — 173, коло — 247. Мелдештин жалпы байге фонду 28 миллион сом.
ДКОнун салтанаттуу ачылыш аземи саат 20.00дө башталат. Иш-чараны 50дөн ашык өлкөнүн 500дөй жалпыга маалымдоо каражатты чагылдырат. Учурда жергиликтүү жана чет элдик ЖМКнын 1500 өкүлү Чолпон-Атада жүрөт.