БИШКЕК, 1-сен. — Sputnik. Түркия президенти Режеп Тайип Эрдоган эки күндүк расмий сапар менен Кыргызстанга келди. Бул тууралуу өлкө башчынын маалымат кызматы билдирди.
"Манас" эл аралык аэропортунда президент Сооронбай Жээнбеков менен Тайип Эрдогандын расмий жолугушуу аземи өттү. Флагштокто эки өлкөнүн туусу көтөрүлүп, Ардак кароол тизилип, гимндер жаңырды.
"Сапардын алкагында 1-сентябрда эки президенттин сүйлөшүүсү, Кыргызстан жана Түркия ортосундагы стратегиялык кызматташтык боюнча кеңештин отуруму болот. Сүйлөшүүлөрдүн жыйынтыгы боюнча бир катар документтерге кол коюлушу мерчемделүүдө жана эки өлкө башчылары пресса үчүн билдирүү жасашат", — деп айтылат маалыматта.
Эрдогандын премьер-министр Мухаммедкалый Абылгазиев жана ЖК төрагасы Дастан Жумабеков менен жолугушуусу пландаштырылган.
Андан соң Көчмөндөр оюнунун ачылыш аземине, 3-сентябрда Түрк тилдүү мамлекеттердин башчыларынын Кеңешинин VI жыйынына катышмакчы.