БИШКЕК, 25-авг. — Sputnik. Чыңгыз Айтматов атындагы проспекти оңдоп-түзөө иштеринен кийин толугу менен ачылды. Бул туурасында мэриянын маалымат кызматынан кабарлашты.
Жолду оңдоо иштери 4,5 айга созулуп, белгиленген мөөнөттөн 2,5 айга эрте бүткөн.
"Бул мезгилдин ичинде Жибек Жолу проспектисинен Семетей көчөсүнө чейинки 9 чакырым жол оңдолду. Бордюрларды кайра коюп чыгышты. Ал эми советтер союзунун учурундагы граниттен коюлгандары ошол бойдон сакталып калды. Болгону алар иретке келтирилди", — деп айтылат маалыматта.
Маалымат кызматынан жолдун катмарларын асфальтбетондоо иштери жаңы ыкма менен жасалгандыгын жана сапатына беш жылдан 10 жылга чейинки мөөнөткө кепилдик берилгендигин айтышты.