БИШКЕК, 17-авг. — Sputnik. Сокулук районунда кырсыктаган автоунаа милиция кызматына таандык экендигин активист Болот Ибрагимов Sputnik Кыргызстанга билдирди.
Жол кырсыктын видеосун ал Instagram тармагына жүктөгөн. Автордун айтымында, окуя 17-августта саат түшкү үчтөр чамасында болгон.
Жол кыймылы коопсуздугун камсыздоочу башкы башкармалыктын Чүй облустук бөлүмүнөн жол кырсык болгондугун тастыкташты.
"Автоунаа Талас облустук милициясына таандык экен. Ал Бишкектен кетип бара жатканда автоунаа бузук болгондуктан, айдоочу рулга ээ боло албай калып, ала салып кетиптир", — деп айтышты аталган башкармалыктын маалымат кызматынан.
Алар жол кырсыктан эч ким жабыркабагандыгын кошумчалашты.
Бишкекте 17-августта маршуртканын айдоочусу 9 жашар баланы койдуруп, тебелеп кеткен.