Sputnik Кыргызстан агенттиги Көчмөндөрдүн дүйнөлүк III оюндарын даярдоо жана өткөрүү боюнча катчылыгы, Жаштар иши, дене тарбия жана спорт агенттиги менен биргеликте спортчулар күч сынашчу мелдеш түрлөрүнүн эрежелерин даярдоодо. Бул ирет монгол бох күрөшү менен тааныштырабыз.
Эреже
Балбандын чыканагы, тизеси же денесинин бир бөлүгү жерге тийсе, жеңилген (кулаган) болуп саналат. Эгерде калыстар балбандар бирдей жыгылганын аныктаса, кармаш кайрадан башталат.
Мелдеш эгерде ачык асман алдында болсо, анда чөп үстүндө, имараттын ичинде болсо, килем үстүндө болот. Таймаш өткөрүлгөн жайдын радиусу 15-20 же 20-20 метр болот.
Кармашуунун мөөнөтү
1, 2 жана 3-айлампада — 10 мүнөт;
4 жана 5-айлампада — 15 мүнөт;
6 жана 7-айлампада — 20 мүнөт;
8, 9 жана 10-айлампада – 25 мүнөт.
Монгол бут кийими менен бирге балбандар "зодог", "шуудаг" аттуу атайын кийимдерди жана бийик кончтуу бут кийим кийишет.
Тыюу салынган ыкмалар
— зодогду (бел боо) эки колу менен толгоо;
— шуудаг менен катуу басып жыгуу;
— башына атайын ыргытуу, колду буроо;
— чабуу жана уруу;
— тебүү;
— кол кайруу.
Дүйнөлүк көчмөндөрдүн III оюндары 2018-жылдын 2-сентябрында Чолпон-Ата шаарындагы ат майданда башталат. Мелдештин курамына спорттун 37 түрү кирип, соңку маалыматтар боюнча 53 өлкөнүн спортчулары күч сынашмай болду. Спорттун түрлөрүнө 15 мамлекеттин улуттук оюндары киргизилген.