БИШКЕК, 8-авг. — Sputnik. Өлкө аймагына аткезчилик жол менен көп сандагы кымбат баалуу унааларды алып кирген ири схеманын бети ачылды. Бул туурасында Sputnik Кыргызстан агенттигинин кабарчысына Экономикалык кылмыштарга каршы күрөшүү кызматы билдирди.
Маалыматка караганда, мындай схеманы түзүүгө Мамлекеттик каттоо кызматынын алдындагы Транспорт каражаттарын жана айдоочулук курамды каттоо боюнча департаменттин өкүлдөрү катышкан.
"Алар ЕАЭБден келген унааларды мыйзамсыз негизде каттоого алып, мамлекеттик номер жана каттоодон өткөнү боюнча күбөлүк жасап берип турушкан. Бул документтерди колдонгон аткезчилер Россия, Беларуссия жана Казакстандын чек араларынан тоскоолдуксуз өтүп турган", — деп Финполдон билдиришти.
Мунун кесепетинен бажы төлөмдөрү казынага түшпөй мамлекет эки миллион сом зыянга учураган.
Финпол унааны өлкө аймагына алып кирген жаран ыктыярдуу түрдө бажы төлөмдөрүн айып пулу менен кошо төлөп, бажы каттоосунан өтсө кылмыш жоопкерчилигинен бошотулушу мүмкүн экенин белгиледи.
Ушул багыттагы мыйзамсыз иштердин бетин ачуу иштери улантылууда.