Ишке бериле элек жатып иштебей калган, тепкичтеринин жарымынан көбү алынып, эми балдар эмес, чоңдор да чыга албай турган "Жаштар" гүлбагындагы жаңы жасалма аска тууралуу Sputnik Кыргызстан агенттиги кызыктуу фактыларды чогултту. Айрым маалыматтар Биринчи Май районунун акиминин орун басары Руслан Шараповдон алынды.
Реконструкциядан кийин. 20-июль күнү Бишкек шаарынын Жибек Жолу көчөсү менен Жаш Гвардия проспектисинин кесилишиндеги "Жаштар" гүлбагындагы реконструкциянын биринчи этабы аяктап, ачылышы болгон. Ал жерге эс алуучуларга ылайык шарттар түзүлүп, жасалма аска салынып, футбол аянтчасы да курулган.
Кооптуу делген жай. Sputnik Кыргызстан агенттигинин кабарчылары жаңы салынган жасалма аскага балдар менен чоңдор коопсуздук куру жок эле чыгып жатканын көргөн. Анан калса балдар "аскага" чыкса артынан караган эч ким жок. Буга байланыштуу кабарчылар тийиштүү органдарга кайрылып, бир күндөн кийин Биринчи Май району жасалма асканын ылдый жагындагы балдар чыгып жаткан тепкичтин баарын алдырткан. Жыйынтыгында ага балдар эмес, чоңдор да чыга албай калган. Сүрөттө көрүнүп тургандай жылаңач төрт бурчтуу темир эле турат.
Курулушка кеткен акча. Асканын баасын мэрия тендерге 1 миллион 821 миң сом деп койгон. Бирок андан уткан компания жасалма асканы 1 миллион 468 миң сомго сала турганын айткан.
Ишке бериле элек. Бир жарым метр тереңдикте бетон куюулуп, темир металлдан турган жасалма асканы азырынча Экологиялык жана техникалык коопсуздук боюнча мамлекеттик инспекциясы текшере элек. Алар сертификат, уруксат кагазын бере электигине байланыштуу бул жайды иштетүүгө болбойт. Биринчи Май району "буга чейин деле ал иштебей турган" дегени менен айлана-тегереги ачык болуп, кайтарган киши болбогондуктан балдар кызыгып "аскага" чыгып кетип жатышкан. Биринчи Май району аны жакынкы күндөрү Альпинизм жана жарга чыгуу федерациясынын балансына өткөрүп берерин айтты.