БИШКЕК, 27-июл. — Sputnik. Вице-премьер-министр Алтынай Өмүрбекова анын талапкерлигин Бишкек шаарынын мэрлигине көрсөтүп жаткандар боюнча пикирин Sputnik Кыргызстан агенттигине билдирди.
Белгилей кетсек, учурда социалдык тармактарда катардагы жарандардан тарта, депутаттарга чейин Алтынай Өмүрбекова Бишкек шаарынын мэрлигине татыктуу талапкер экенин жазып, аны сүрөп жатышат.
Өмүрбекова бул тууралуу оюн мындайча билдирди.
"Биринчиден, мени колдоп жаткандардын бардыгына чоң ыраазычылыгымды билдирем. Ишеним көрсөтүп жатышканы мен үчүн чоң жоопкерчилик. Мага азырынча расмий сунуш түшө элек, эгер түшсө дагы аны ойлонуп анан чечим кабыл алуу керек. Азыр вице-премьер катары тейлеп жаткан тармактарда, социалдык коргоо, саламаттык сактоо, билим берүү системасында иштер көп", — деди ал.
Вице-премьер алдыда абдан жооптуу иш-чаралар пландалгандыктан, учурда ошону менен алектенип жатканын белгиледи.
Эске салсак, Бишкек шаардык кеңештеги көпчүлүк коалиция Азиз Суракматовду мэрликке расмий көрсөттү.
Бишкек мэрин шайлоо 8-августка белгиленген.