БИШКЕК, 23-июл. — Sputnik. Бишкек шаарынын мурдагы мэри Албек Ибраимовго муниципалдык жерди өз кызыкчылыгы үчүн саткан деп жаңы айып тагылды. Бул тууралуу УКМКнын маалымат кызматы билдирди.
"Тергөөдө белгиленгендей, Ибраимов пайда көрүү максатында өзүнүн жеке ыйгарым укугунан пайдаланып Бишкек шаарынын түштүк аймагында жайгашкан муниципалдык жер тилкелерин мэриянын башка кызмат адамдары менен менчикке берүү боюнча кылмыштуу схеманы уюштурган", — деп айтылат УКМК тараткан маалыматта.
Ошол эле учурда өзгөчө ири өлчөмдө акчалай пайда алуу максатында жер тилкелерин өздөрүнө тиешеси бар тараптарга каттатып, алар аркылуу башка жактарга саткан деп кошумчалашкан.
Учурда экс-калаа башчы Ибраимов УКМКнын убактылуу тергөө жайына киргизилди.
Эске салсак, Албек Ибраимов 19-июлда Биринчи Май райондук сотунун чечими менен тергөө аяктаганга чейин деп 28-августка дейре камакка алынган.
Ал "ТНК Дастан" ААКы боюнча Кылмыш жаза кодексинин 171-беренеси ишенип берилген мүлктү ыйгарып алуу же төлөмөр болуу боюнча кылмыш иши козголгон. Иликтөө маалында Ибраимов аталган ишкананын башкармалыгынын төрагасы болуп туруп, коргонуу багытындагы каражатты сатып алуу үчүн ири суммадагы каражат кетчү келишим түзгөн. Мындан соң ал товар жеткирип берген тараптан акчалай сыйлык катары 270 миң доллар алганы айтылат. Ушул эле кылмыш иштин алкагында "Солнечный берег" пансионатын сатууда мамлекетке 152 миллион сом чыгым тарттырганы белгиленген.