БИШКЕК, 16-июл. — Sputnik. Москва шаарынын аэропортунан адам өлтүрүүгө шектелип кыргызстандык жаран кармалды. Бул тууралуу Чүй облустук ички иштер башкармалыгынын маалымат кызматы кабарлады.
Билдирүүгө ылайык, шектүү кылмыш кылган соң Кыргызстандан чыгып кеткен.
"4-июль күнү Ысык-Ата райондук ички иштер башкармалыгынын нөөмөт бөлүмүнө Кант шаарынын тургунунан 54 жаштагы күйөөсү 1-июлда үйүнөн чыгып кеткен бойдон келе электиги боюнча арыз түшкөн. Ага ылайык, Кылмыш жаза кодексинин 123-беренесинин 4-бөлүмү (адам уурдоо) боюнча кылмыш иши козголгон", — деп жазылат маалыматта.
Ыкчам-иликтөө иштеринин жүрүшүндө киши колдуу болгон адамдын аялы жана 38 жаштагы М.Э. аттуу киши колго түшүрүлсө, ошол учурда Бишкектен Россияга учуп кеткен 39 жаштагы С.Н. аттуу жаранга издөө жарыяланган.
Аны Кыргызстан менен Россиянын укук коргоочулары Москванын аэропортунан кармашкан. Учурда шектүүлөр убактылуу кармоочу жайга киргизилип, экспертиза дайындалды. Кылмыштын чоо-жайы такталууда.