БИШКЕК, 15-июл. — Sputnik. Россияда өткөн футбол боюнча дүйнө биринчилигинде Франция чемпион болду. Финалда Франциянан курама командасы Хорватияны 4:2 эсебинде утуп алды.
Чемпионаттын финалы Москва шаарындагы "Лужники" стадионунда өтүп, аргентиникалык калыс Нестор Питана көзөмөлдөдү.
Оюн башталганда эле командалар мыкты болуш үчүн өз аракеттерин көрүштү. 18-мүнөттө хорватиялык оюнчу Марио Манджукич өз дарбазасына гол киргизип алды. Арадан он мүнөт өткөндөн кийин 28-мүнөттө хорватиялык Иван Перишич эсепти теңеди. Ал эми 38-мүнөттө футболчу Антуан Гризман пенальти тээп командасын 2:1 эсибенде алдыга сууруп чыкты. Биринчи тайм аяктагандан кийин калыс кошумча 3 мүнөт берди.
Экинчи таймдын 53-мүнөтүндө аскер кийимин кийген күйөрмандар оюн талаасына чуркап чыкты.
59-мүнөттө франциялык оюнчу Поль Погбанын тепкен тобу атаандашынын дарбазасына кирип эсеп 3:1 болду. Арадан алты мүнөт өткөндө франциялыктар дагы бир гол киргизди. Бул жолу Килиан Мбаппенин тепкен тобу ийгиликтүү болду. Эсеп 4:1.
Калыс негизги таймга 5 мүнөт кошуп берди. Бирок командалардын аракетинен майнап чыккан жок.
Франция ушуну менен экинчи жолу дүйнө чемпиону болуп жатат. 1998-жылкы Футбол боюнча дүйнө чемпионатында Бразилияны утуп чемпион болгон.
Ал эми үчүнчү орун үчүн Бельгия менен Англия беттешкен. Жыйынтыгында бельгилык оюнчулар 2:0 эсебинде жеңишке жеткен.
Белгилей кетсек, быйыл футбол боюнча дүйнө чемпионаты 14-июнда башталып, 15-июлда жыйынтыкталды. Оюндар Россиянын 11 шаарындагы 12 стадиондо өттү.