БИШКЕК, 6-июл. — Sputnik. Жайкы эс алуу учурунда бардык тараптан сак болуу керектигин Ысык-Көл ОИИБинен эскертишти.
Өзгөчө бул көл жээгинде эс алып жүргөндөргө тиешелүү.
"Биринчиден, социалдык тармактарда кылдат болуу зарыл. Качан кайсы жакка кетип, канча убакыт жүргөнүңөрдү жазбагыла. Анткени силерди бир гана жакындарыңар эмес, ууру-кескилер дагы окуп калышы ыктымал. Кайсы учурда үйдө киши жок болорун билгендер ошол замат ууруга келет", — деп айтылат милициянын билдирүүсүндө.
Ал эми эс алуу үйлөрүнө, пансионаттарга токтогондор баалуу буюмдарды аманат камерасына өткөрүп койгону оң. Себеби көпчүлүк жайлардын администрациясы жоголгон буюм-тайым үчүн жоопкерчилик албайт.
Мындан тышкары, облус милициясынан жайкы эс алуу учурунда көл жээгиндеги уурулук күч аларын эскертип, баалуу буюмдарды көздөн оолак кармоону сунуштайт.