БИШКЕК, 28-июн. — Sputnik. Башкы прокуратура 25-июнда Жогорку Кеңештин депутаты, мурдагы биринчи вице-премьер Аскарбек Шадиевге карата Кылмыш жаза кодексинин 346-беренесинде (Мамлекеттик чек араны мыйзамсыз кесип өтүү) каралган белгилер боюнча кылмыш ишин козгоду. Бул тууралуу УКМКнын маалымат кызматы билдирди.
Учурда тергөө амалдары жүрүп жатат.
27-апрелде Шадиев Баткен облусунун Исфана шаарындагы тууганынын зыйнатына барып, андан ары Лейлек районунун Арка айылынан сууну кечип кыргыз-тажик чек арасын мыйзамсыз кесип өткөн. 28-апрелде Хожент — Москва каттамы менен учуп кеткени аныкталган. Андан ары дипломаттык паспорту менен Нью-Йорк шаарына кеткен.
Шадиевге буга чейин Кылмыш жаза кодексинин "Кызматынан кыянаттык менен пайдалануу" беренеси боюнча кылмыш иши козголгон.
Бишкек шаардык Биринчи Май райондук соту анын баш коргоо чарасын карап, камакка алуу өкүмүн чыгарган.