БИШКЕК, 28-июн. — Sputnik. Ош шаардык милициясы үч баланы сабады деген шек менен кармаган MMA мушкери жана кылмыштуу топтун мүчөсүн шаардык сот үй камагына чыгарды. Бул туурасында ШИИБдин маалымат кызматынан билдиришти.
Эскерте кетсек, 25 жаштагы Ж.Р. жана 24 жаштагы А.Б. аттуу адамдар калаадагы түнкү клубдардын биринде үч баланы ур-токмокко алды деген шек менен 25-июнда кармалган. Окуя 20-июнь күнү болгон.
"Кечээ, 27-июнда түштөн кийин Ош шаардык сотунда шектүүлөрдүн баш коргоо чарасы каралып үй камагына бошотулду. Тергөөчүлөрдүн аларды абакта калтыруу боюнча өтүнүчүн сот канааттарбай койду", — деп айтылат маалыматта.
Аталган факты боюнча алгач Кылмыш жаза кодексинин 234-беренеси (бейбаштык) боюнча кылмыш иши козголуп, кийин экспертизанын жыйынтыгы менен юридикалык баа берилип, кылмыш иши 105-беренеге (ден соолукка жеңил залака тийгизүү) өзгөртүлгөн.