БИШКЕК, 21 июн — Sputnik. Аралаш мушташ оор салмактагы кыргызстандык мушкер Тилек Жээнбеков кийинки беттешин Түштүк Кореядагы Angels Fighting лигасында өткөрөт. Бул туурасында Sputnik Кыргызстан маалымат агенттигине анын машыктыруучусу Кенжебек Чекиров билдирди.
Мелдеш 23-июль күнү Сеул шаарында өтөт. Жээнбековдун атаандашы кореялык Жун Су Лим болмокчу.
Бул кыргызстандык мушкердин жыл жаңыргандан берки үчүнчү кармашы. 6-мартта украиналык Юрий Проценкону жеңсе, 14-майда швециялык Малик Тамбени утуп алган. Жээнбеков атаандаштарынын бардыгын техникалык нокаут менен жер караткан.
Тилек Жээнбеков — панкратион боюнча Евразия чемпиону, универсиалдуу кармаш боюнча дүйнө чемпионатынын күмүш медаль ээси. Күжүрмөн самбо, кол таймашы, грэпплинг боюнча Кыргызстандын чемпиону. ММА боюнча профессионалдуу мушкер.