БИШКЕК, 21-июн. — Sputnik. Премьер-министр Мухаммедкалый Абылгазиев бүгүн, 21-июнда, "Коопсуз шаар" долбоорун ишке ашыруу боюнча кеңешме өткөрдү. Бул тууралуу өкмөттүн аппаратынан маалымдашты.
Маалыматтык технологиялар жана байланыш комитетинин төрагасы Бакыт Шаршембиев кеңешме учурунда долбоордун техникалык-экономикалык негиздемесин иштеп чыгуу процесси аяктаганын маалымдады.
"Биз жакынкы айларда бул долбоорду ишке ашыра турган компанияны тандоо үчүн сынак жарыялоону пландап жатабыз. Жалданма компания бардык зарыл болгон жол инфраструктурасын түзүп, кыймыл жыш болгон кесилиштерде эреже бузууларды каттаган камераларды орнотуусу керек", — деди Шаршембиев.
Ал ошондой эле "Коопсуз шаар" Автоматташтырылган платформасынын" программалык камсыздоосу "Инфоком" мамлекеттик ишканасынын адистери тарабынан даярдалганын белгиледи.
Кеңешменин жүрүшүндө премьер-министр коом өкмөттөн жол кырсыктарын кыскартуу жана коопсуздукту камсыздоо боюнча чечкиндүү кадамдарды күтүп жатканын белгилеген.
"Биз "Коопсуз шаар" долбоорун ишке ашырууга маалыматтык технологияларды киргизүү тармагында тажрыйбасы бар жана IT-кызматтары рыногунда ийгиликтүү чет элдик компанияларды тартышыбыз керек. Аларды тандоо процедурасы ачык-айкын өтүшү зарыл", — деди Абылгазиев.
Ал ошондой эле сынакка катышкандардын кепилдик төлөмүн 10 миллион долларга чейин көбөйтүүнү сунуштады.
"Эгерде жеңүүчү компания сынактын шарттарын аткарбаса, анда көрсөтүлгөн сумма мамлекеттик бюджетке которулат", — деди премьер-министр.
Өкмөт башчы Маалыматтык технологиялар жана байланыш комитети "Коопсуз шаар" долбоорунун милдеттерин ишке ашырууда жооптуу орган экенин өзгөчө белгиледи.