БИШКЕК, 17-июн. — Sputnik. Москва шаарынын мэри Сергей Собянин Twitter баракчасына бир нече адамды коюп кеткен айдоочунун окуясы тууралуу жазып, абал жеке көзөмөлүндө экенин айтты.
Эскерте кетсек, кырсык 16-июнь күнү Москванын чок ортосунда болгон. Кыргызстандын Россиядагы элчилигинин маалыматы боюнча таксист КР жараны болуп чыккан.
"Ильинкада таксиге байланыштуу жагымсыз окуя болуп кетти. Айдоочу рулга ээ боло албай калыптыр. Бир нече адам жабыркады, аларга тийиштүү жардам көрсөтүлдү. Абал менин жеке көзөмөлүмдө", — деди Собянин.
Такси айдоочусу окуя болгон жерден кетип калууга аракет кылган. Бирок аны күбөлөр кармап калышканы айтылды.