Кыргыз Республикасынын эл артисти Асанкан Жумакматов 1923-жылы 16-июнда Чүй облусунун Ысык-Ата айылында төрөлгөн. Балалыгынын көпчүлүк бөлүгү Украинада өтүп, кийин кичи мекенине кайтып келген. 17 жашында Улуу Ата мекендик согушка катышып, Сталинградда жаракат алып Кыргызстанга кайткан. Токтогул Сатылганов атындагы мамлекеттик сыйлыгынын лауреаты 1948-жылы дирижёрлук студияны артыкчылык менен аяктап, Опера жана балет театрына башкы дирижёр болуп ишке алынган. 1957-жылы Москвадагы консерваторияны кызыл диплом менен бүтүрөт. Маэстро ондогон жыл Кыргыз академиялык опера жана балет театрында, Карамолдо Орозов атындагы эл аспаптар оркестринде жана улуттук филармонияда башкы дирижёр болуп эмгектенген.
Анын жетектөөсүнүн алдында КМШ өлкөлөрүндө, бир катар батыш мамлекеттеринде концерт коюлган. 70 жыл өмүрүн музыкага арнап Болот Миңжылкиев, Кайыргүл Сартбаева, Токтоналы Сейталиев, Дарика Жалгасынова жана Керим Турапов өңдүү бир топ классик аткаруучуларды тарбиялай алган. Музыкант он жыл мурун 85 жаш курагында дүйнө салган.