Атасын кызматтык тапанча менен атып өлтүргөн лейтенант, кичинекей чүрпөнү зордуктоого аракет жасаган өгөй ата жана көчөдөгү селсаякты өлтүрүп, мүчөлөгөн шектүү. Sputnik Кыргызстан агенттиги 25 жыл мурун июнь айында чыккан гезиттерди барактап, ошол учурдагы оозду ачырган окуяларды сунуштайт.
Селсаяктын башы, колу кесилип…
Борбор калаада милиция кызматкерлери түндө көчөдө кетип бараткан шаар тургунун токтотуп, аны тинтүүгө алышкан. Ошол учурда анын көтөрүп жүргөн баштыгынан адамдын кесилген башы менен колу чыгат. Андан көп өтпөй ошол райондогу парктын аймагында дене мүчөсү жок адамдын сөөгү табылган. Колго түшкөн шектүү суракта негедир адамдын этин даамдагысы келгендигин, ал үчүн көчөдө бөтөлкө чогултуп жүргөн эркекти өлтүргөндүгүн айткан. Тергөө маалында ал киши психологиялык жактан оорулуу экендиги, атайын каттоодо тургандыгы аныкталган.
Атасына ок аткан уул
Милицияга 52 жаштагы жаран тапанча менен өзүн-өзү атып алды деген кабар түшкөн. Жерине барып иштеген адистер Макаров тапанчасынын огу маркумдун жаагына тийигени жана курал анын уулунуку экендигин аныктаган. Ошондой эле баллистикалык экспертиза каргаша капысынан эмес атайы жасалгандыгын тактаган. Жыйынтыгында кылмышка шектелип 29 жаштагы ок жеген кишинин лейтенант баласы колго түшүрүлгөн.
Өгөй атанын былыктары
Эки жаштагы ымыркайды өгөй атасы катуу сабап, зордуктоого аракет жасаган. Кичинекей чүрпө баш мээси чайкалып, колу сынып, дене-башы көгала, күйүк болгон абалда ооруканага түшкөн. Милиционерлер жабырлануучунун атасын камакка алып, кылмыш ишин козгогон. Шектүү ал иштерди жасагандыгын четке каккан эмес. Соттук-медициналык экспертиза да анын акыл-эси жайында эместигин аныктап, психиатриялык ооруканага эки айга жөнөткөн.
Беш жылга кесилген келин
Соттолгон келин кырсык болгонго чейин жолдошу менен жашап, бирге түтүн булатып, кичинекей кызын тарбиялап келген. Бирок анын кубанычы бат эле азапка айланган. Себеби анын ичкилик ичип, наркотикалык заттарды колдонгон жолдошу жубайына көп кол көтөрө баштаган. Мас абалында колуна эмне тийсе ошону менен аялын, кызын, жада калса кайнатасын кошо уруп турган. Так ошондой күндөрдүн биринде чыдамы кеткен келин ачууланып, уктап жаткан күйөөсүн балтанын сабы менен койгулап өлтүргөн. Сот бардык жагдайларды эске алып, аны беш жылга эркинен ажыраткан.
Тонолгон подполковник
Түндө кетип бараткан подполковниктен үч адам жардам сурап, анын жеңил унаасына түшүшкөн. Бир маалда жүргүнчүлөр айдоочу милиционерге кол салып, машинасын айдап кетишкен. Кызыгы, катуу сабалган жабырлануучу Бишкек шаардык ички иштер башкармалыгынын жетекчилигин аркалаган кызматкер болуп чыккан.
Май айындагы чуулгандуу соттук чечимдерди Sputnik Кыргызстан агенттигинин материалынан окуңуздар