БИШКЕК, 6-июн. — Sputnik. Президент Сооронбай Жээнбеков Кытайга болгон мамлекеттик иш сапардын алкагында бир нече жолугушууларды өткөрүп, ШКУ саммитине катышат.
Мамлекет башчы Кытай эл Республикасынын (КЭР) төрагасы Си Цзиньпин, Кытай мамлекеттик кеңешинин премьери Ли Кэцян жана Эл өкүлдөрүнүн Бүткүл кытайлык жыйынынын Туруктуу комитетинин төрагасы Ли Чжаньшу менен жолугушат.
"Бир катар эки тараптуу документтерге кол коюулары күтүлүүдө. Анын ичинде ар тараптуу стратегиялык өнөктөштүктү орнотуу жөнүндө Кыргызстан менен Кытайдын ортосундагы биргелешкен декларация бар", — деп айтылат маалыматта.
Андан соң Жээнбеков 9-10-июнда өтө турган ШКУга мүчө мамлекеттердин башчыларынын Кеңешинин кезектеги жыйынына катышуу үчүн Циндао шаарына (Кытай) учуп кетет.
Саммитте кытай тараптын ШКУга мүчө мамлекеттердин башчыларынын Кеңешине төрагалыгынын мөөнөтү (2017-2018) аяктап, аны 2018-2019-жылдарга Кыргызстанга өткөрүп берет.
Мындан сырткары, Жээнбеков Тажикстандын президенти Эмомали Рахмон, Индиянын премьер-министри Нарендра Моди, Монголиянын президенти Халтмаагийн Баттулга менен эки тараптуу жолугушууларды өткөрөт.