БИШКЕК, 1-июн. — Sputnik. Мурдагы биринчи вице-премьер Аскарбек Шадиев ага кылмыш иши козголгондон кийин 28-апрелде Хожент — Москва каттамы менен учуп кеткени аныкталды. Андан ары дипломаттык паспорту менен Нью-Йорк шаарына кеткен. Бул тууралуу Улуттук коопсуздук мамлекеттик комитети билдирди.
Ага ылайык, 27-апрелде Шадиев Баткен облусунун Исфана шаарындагы тууганынын зыйнатына барып, андан ары Лейлек районунун Арка айылынан сууну кечип кыргыз-тажик чек арасын мыйзамсыз кесип өткөн.
"Шадиевдин жакындарынын айтымында, ал дарыланууга кетип, бир-эки жуманын ичинде кайтып келет. Бирок Шадиев азыркыга чейин тергөө органдарынан жашынып жүргөндүктөн издөөгө алынды", — деп айтылат маалыматта.
Ошондой эле Бишкек шаардык Биринчи Май райондук соту анын баш коргоо чарасын карап, камакка алуу өкүмүн чыгарган.
Жакында эле УКМК Шадиев менен жакын тууганынын мүлкүн камакка алганын жар салды. Кеп бир нече батир менен турак үй жана 12 компаниядагы үлүш тууралуу болууда.