БИШКЕК, 30-май — Sputnik. Киевде 29-майда, кечинде атылган россиялык журналист Аркадий Бабченкону артынан аңдып жүргөн киллер өлтүрдү. Мындай пикирди маркумдун достору айткан.
Окуя анын үйүнүн жанында болгон. Журналист Юрия Мацарскийдин айтымында, анын артынан түшкөн киши эле түбүнө жетти.
"Окуяны тизмектесек, ал үйүнө келгенден кийин көп өтпөй эле ок жеген. Демек, даярдык кадимкидей болгон. Бул өч алам деген кандайдыр бир фанатик эмес, бул аттанып түшкөн, даярдык менен жасалган өлтүрүү", — деди Мацарский.
Бабченко жаңы эле эс алуудан келгенден кийин ага кол салуу болгонун досу Айдер Муждабаев айтып берген.
Киев шаарында үйүнүн жанынан россиялык журналист Аркадий Бабченкону атып кетишти. Үйүнүн тепкичинде турганда далысына ок жеген журналист, ооруканага жетпей жолдон, Тез жардам унаасында көз жумган. Бул туурасында Украинанын Жогорку радасынын депутаты, ИИМдин коллегиясынын мүчөсү Антон Геращенко да билдирген.
"Алар үй-бүлөсү менен эс алып жаңы эле келишкен. Кайда барышкандыгын билбейм, себеби мага айткан эмес. Кеткенинен кабарыбыз бар эле, бирок качан кайтарын билбейт элек. Өздөрүнүн автоунаасы менен жүрүшкөн. Машинада тыңшагыч болгон го деп ойлоп жатам. Алар (өлтүргөндөр – ред.) анын кайда басып-турганын билген окшойт", — деген Муждабаев.
Россиянын Тергөө комитети россиялык жарандын Киевде өлтүрүлүшү боюнча кылмыш ишин козгоду.