БИШКЕК, 21-май — Sputnik. Кыргыз эл жазуучусу, белгилүү драматург жана журналист Көчкөн Сактанов узакка созулган оорудан улам 76 жаш курагында каза болду. Бул тууралуу Маданият, маалымат жана туризм министрлигинен кабарлашты.
Билдирмеге караганда, жазуучу жана драматург 20-май күнү көз жумган.
Көчкөн Сактановдун адабияттагы чыгармачылык жолу 1968-жылы "Үчөөнүн жүрөгү" деген повести жарык көргөндөн кийин башталган. Ошондой эле "Бүттү, быйыл күйөөгө чыгам" жана улуу жазуучу Төлөгөн Касымбеков менен биргелешип жазылган "Курманжан датка" аталышындагы пьесалары чоң ийгилик менен өлкөбүздүн көптөгөн театрларында коюлган.
Жазуучунун чыгармачылык ишмердигинин дүркүрөп өскөн мезгили 1974-2013-жылдарга туура келет. Ал ушул аралыкта "Апама кат", "Умтулуу", "Адат азабы", "Мурас", "Маркумдар үнү", "Сталинден кийинки заман", "Чөөлөрдүн заманы", "Искендер Зулкарнайн", "Алымбек датка", "Курманжан датка", "Атилла" жана башка аңгеме, повесть жана романдарын окурмандарга тартуулаган.