БИШКЕК, 10-май — Sputnik. Экс-премьер-министр Жантөрө Сатыбалдиев депутаттарга кайрылып, аларды жегичтер, ичкичтер деп шылдыңдабоого чакырды. Мындай аракет депутаттарга да, мурдагы өкмөттүн мүчөлөрүнө да аброй алып келбей турганын айтты.
Сатыбалдиев Бишкек ТЭЦтин модернизациялоо боюнча Атамбаев эч кандай көрсөтмө бербегенин айтты. Буга чейин депутататтык комиссиянын мүчөсү Исхак Масалиев ошол кездеги президент Атамбаев финансы жана энергетика министрлерине түзмө-түз буйрук бергенин айтып, мурунку өлкө башчыны кол тийбестиктен ажыратууну сунуштаган.
"ТЭЦти модернизациялоо боюнча "бул компанияны танда" деп президент кат түрүндө да, оозеки түрдө да тапшырма берген эмес", — деди ал.
Жогорку Кеңештин бүгүнкү жыйынына мурдагы премьерлер — Жантөрө Сатыбалдиев, Темир Сариев, Сапар Исаков катышууда. Ошондой эле ТЭЦти модернизациялоо боюнча келишимге кол коюлуп жатканда финансы министри болуп иштеген Ольга Лаврова да келди.