БИШКЕК, 2-май — Sputnik. Бажы кызматынын төрагасынын мурунку орун басары Райым Матраимовдун өкмөткө койгон доосунун негизиндеги сот отуруму 10-майга жылды.
Ишти Биринчи Май райондук соту карап, ага Алмаз Калыбаев судьялык кылды.
Сотко Райым Матраимовдун өкүлү Татьяна Каражинская катышкан. Ал эми өкмөт менен Бажы кызматынан эч ким келген эмес.
Кийинки отурум 10-майда саат 9.00дө болмокчу.
Эскерте кетсек, Райым Матраимов 2015-2017-жылдар аралыгында Мамлекеттик бажы кызматынын жетекчисинин орун басары болуп иштеген. Өткөн жылдын 23-ноябрында премьер-министр Сапар Исаков "ишенимден чыкты" деген жүйө менен аны кызматтан алган.
Матраимов "негизсиз иштен алынганын" айтып, Исаков башында турган өкмөттү сотко берген.