Быйыл күздө үчүнчү ирет өтө турчу Дүйнөлүк көчмөндөр оюнуна мамлекеттен 306 миллион сом бөлүнөт. Мындан сырткары, демөөрчүлөр да бар. Бул тууралуу Айжан Абдесова Sputnik Кыргызстан радиосуна маек куруп жатып билдирди.
Анын айтымында, быйылкы оюндарга 102 мамлекеттен конок чакырылган.
"Жалпы бөлүнгөн каражаттын бир бөлүгү маданий иш-чараларга, дагы бир бөлүгү спорттук оюндарга жумшалат. Мындан сырткары, Чолпон-Ата шаарындагы ат майданга да 10 миллион сом каралган. Бул каражат ипподромду эл аралык талаптарга жооп бергендей деңгээлде кармап турууга жумшалат", — деди Абдесова.
Ал ар бир багытка бөлүнгөн суммага чек коюлгандыгын, андан ашыкча акча коротулбастыгын кошумчалады.
Эскерте кетсек, эл аралык оюндар үстүбүздөгү жылдын 2-8-сентябрь күндөрү Ысык-Көлдө өткөрүлөт.