АНКАРА, 10-апр. — Sputnik. Президенти Сооронбай Жээнбеков Түркиядагы расмий сапарынын алкагында бүгүн, 10-апрелде Анкара шаарында Чынгыз Айтматов атындагы көчөдө жайгашкан улуу кыргыз жазуучусу Чыңгыз Айтматовдун бюстуна барды.
Мамлекет башчысы Айтматовдун бюстуна гүл коюп, бир мүнөт үн катпай улуу жазуучуну эскерди.
Кечээ, 9-апрелде түркиялык кесиптеши Режеп Тайип Эрдоган менен сүйлөшүүлөрдү жыйынтыктап жатып, Жээнбеков Түрк маданиятынын эл аралык уюму (ТҮРКСОЙ) 2018-жылды кыргыз элинин залкар жазуучусу Чынгыз Айтматовдун жылы деп жарыялаганын белгилеген.
“Менин Түркияга болгон расмий сапарым “Айтматовдун жылына” туш келди — бул тарыхый окуя”, — деп баса белгилеген өлкө башчы.
Чыңгыз Айтматов атындагы көчөгө бюст орнотуу идеясы Кыргызстандын Түркиядагы элчилигине таандык жана жазуучунун 2014-жылы белгиленген 85 жылдык мааракесине арналган. Бул идеяны Анкара шаарынын мэриясы колдоп, бюстту даярдоого каражат бөлгөн. Бюсттун автору кыргызстандык скульптор Чынгыз Шакеев.