БИШКЕК, 6-апр. — Sputnik. Премьер-министр Сапар Исаков күрөш боюнча Азия чемпионатында өзгөчөлөнгөн спортчуларды сыйлады. Бул тууралуу өкмөттүн маалымат кызматынан кабарлашты.
Исаков өлкөнүн тарыхында грек-рим күрөшү боюнча кыргыз балбандары алгачкы жолу командалык эсепте биринчи орунду алганын айтып, мындай жетишкендик өлкө үчүн сыймык экенин белгилеген.
"Премьер спортту өнүктүрүү "Жаңы доорго — кырк кадам" өкмөттүк программасынын бир багыты экенин эске салды", — деп айтылат маалыматта.
Ал ошондой эле Азия чемпионатында өзгөчөлөнгөн спортчулар менен машыктыруучуларга бекем ден соолук каалап, өкмөттүк жана акчалай сыйлыктарды тапшырды.
Эске салсак, 27-февралдан 4-мартка чейин Бишкекте күрөш түрлөрү боюнча Азия чемпионаты өткөн. Кыргызстандык балбандар жалпы эсеп менен 11 (2 алтын, 3 күмүш, 6 коло) медаль багындырып, командалык эсепте биринчи орунду ээлеген.