БИШКЕК, 5-апр. — Sputnik. Орус-кыргыз өнүктүрүү фондусу бөлгөн каражатка Кыргызстандан өндүрүлгөн товар менен жабдуулар сатып алынышы керек. Бул тууралуу Орус-кыргыз өнүктүрүү фондусунун кеңешинде аталган фонддун кеңешинин төрагасы, Россиянын финансы министринин орун басары Сергей Сторчак билдирди.
Эскерте кетсек, фонд 2014-жылы ЕАЭБге кирген Кыргызстандын экономикасын модернизациялоо үчүн түзүлгөн. Уставдык капиталы 500 миллион долларды түзөт. Бул каражатты Россия тарап бөлгөн.
Сторчактын айтымында, учурда фонддун активи Кыргызстандын банк системасынын жалпы көлөмүнүн 10 пайызын түзөт.
"Ар кандай кырдаалдардан улам фонд кыргыз-орус соода-сатыгын эң жогорку деңгээлге чыгара алган жок. Бирок аны пассивдүү иштеп жатат деп да айыптоого болбойт", — деди кеңештин жетекчиси.
Ал ошондой эле фонддун жетекчилиги эки тараптуу экономикалык мамилелердин катализатору болууга аракет жасап жатканын белгиледи.
"Бир катар долбоорлордун алкагында фонддун каражатына Кыргызстанда же Россияда чыгарылбаган жабдыктар сатып алынат. Билип турам, бул аргасыздыктан жасалган нерсе. Бирок үчүнчү мамлекеттердин өндүрүшүн Россия бөлгөн каражатка финансылоо бир аз туура эмес", — деди ал.
Төрага фонддун каражатына жабдыктар биринчи кезекте Кыргызстандан, андан кийин Россия, болбой калды дегенде гана үчүнчү өлкөлөрдөн алынышы керектигин кошумчалады.