БИШКЕК, 30-мар. — Sputnik. Министрликтер менен башка мамлекеттик органдарга "Таза Коом" долбоорун ишке ашыруунун алкагында санарипти өнүктүрүү боюнча жетекчинин орун басарлык кызматы киргизилди. Бул тууралуу өкмөттөн билдиришти.
Тиешелүү токтомго премьер-министр Сапар Исаков кол койгон. Мындай чечим келечекте мамлекеттик органдардын ишмердүүлүгүнө маалыматтык технологияны кийирүү үчүн кабыл алынды.
Өкмөт башчынын айтымында, мамлекеттик кызматтарды электрондук форматка өткөрүүдө эл менен кызматкерлердин байланышын азайтып, коррупциялык иштердин болушуна бөгөт коюлат.
"Министрлердин жаңы орун басарлыгына жаш, билимдүү, тажрыйбалуу адистер алынып, министрлик менен ведомстволордогу санариптик долбоорду алдыга жылдыруу менен алектенишет", — деди Исаков.
"Калган министрликтер менен ведомстволор санариптик трансформацияга кошулуулары керек. Бул уюмдардагы потенциал ишке ашпаган бойдон турат. Себеби министрликтер менен ведомстволордо экспертизага дал келе турчу кадрлар жок", — деп өкмөт башчы белгилеген.
Маалыматта штаттын кеңейтилиши жана кошумча чыгым каралбаганы белгиленет. Бардык иш өкмөттүн 2018-жылга карата каралган бюджетинин негизинде ишке ашат.
Жаңы чиновниктер пайда болчу мамлекеттик органдар:
— Экономика министрлиги;
— Финансы министрлиги;
— Айыл чарба, тамак-аш өнөр жайы жана мелиорация министрлиги;
— Транспорт жана жолдор министрлиги;
— Юстиция министрлиги;
— Өзгөчө кырдаалдар министрлиги;
— Саламаттык сактоо министрлиги;
— Билим берүү жана илим министрлиги;
— Эмгек жана социалдык өнүгүү министрлиги;
— Ички иштер министрлиги;
— Өнөр жай, энергетика жана жер казынасын пайдалануу комитети;
— Маалыматтык технология жана байланыш агенттиги;
— Мамлекеттик архитектура, курулуш жана турак-жай коммуналдык чарба агенттиги;
— Мамлекеттик монополияга каршы агенттик;
— Мамлекеттик салык кызматы;
— Мамлекеттик бажы кызматы;
— Финансы рыногун жөнгө салуу жана көзөмөл кылуу кызматы;
— Интеллектуалдык менчик жана инновациялар мамлекеттик кызматы;
— Миграция кызматы;
— Мамлекеттик мүлктү башкаруу фонду;
— Социалдык фонд;
— Мамлекеттик чек ара кызматы.