Кечээ борбор калаада Нооруз майрамы салтанаттуу белгиленди. Күн да чайыттай ачылып, элдин баары жазгы маанай менен көчөгө агылып чыкты. Майрамды "Ала-Тоо" аянтында өткөрүүгө келгендер миңдеп саналды. Эртеден кечке борбордук аянтта, тегерек-четиндеги парктарда адам саны үзүлбөдү. Ошентип улуттук майрамыбызды да өткөрдүк. Бирок менин айтайын дегеним башка маселе…
Майрам күндөрү эл көп болорун баары билет! Анан ошого ылайыктап таштанды салуучу урналардын санын көбөйтүп, анысы толору менен алмаштырып турса болбойбу? Таштандыны колуңа кармап баратып каякка саларыңды билбей кашаясың го, чиркин. Соцтармакка чыккан сүрөттөрдө 10 литр суу бата турган урнанын тегерек четинде таштанды жайнап жатат. Байкуштун "болду" дегенине карабай сала берип ашып-ташып кетиптир. Таштаганга жай жок болсо эмне кылышсын анан? Айла жок ыргытат да! Алган нерсесин кагаз-кабыгы менен кошо жемек беле?! Жөнөкөй эле мисал, ажаткана салбай туруп турак-жай курууга киришип көрчү, тегерек-четиң эмне болот экен. Баса "Тазалыктын" маалымат катчысы кечинде эл чогулган жерге желим баштыкты таштап соцэксперимент жасаптыр. Жоругуң жолдо калгыр дегиң келет…
Бүгүн эртең менен ошол эле "Тазалык" ишканасы "борбордук аянттан 11 тонна таштанды алып чыктык" деп маалымат таратты. Ошондой эле аянтка кошумча жалпысынан 16, Курманжан датканын эстелигинин алдына 18 таштанды челеги орнотулганы жана дөңгөлөгү бар 10 желимден жасалган контейнер менен кызматкерлер нөөмөткө туруп күн бою тазалашканы айтылат.
Ошол эле учурда ичкенин-ичкен, жегенин-жеген жерде калтырган адамдар бар экенин да танууга болбойт. Аларга айтарым, коомдук жайда бир адам жаман ишке барса элдин баарына сөз тиерин унутпайлы. Кийинки майрамдарда таштанды чакалары жетиштүү, элибиз элпек болсун деп тилейм.
Автордун ою редакциянын пикири менен дал келбей калышы мүмкүн.