БИШКЕК, 19-мар. — Sputnik. Португалияда шоколад боюнча өткөн эл аралык фестивалда дүйнөдөгү эң кымбат момпосуй жасалганын The Portugal News басылмасы билдирди.
Момпосуйдун баасы 7 728 евро турат. Аны жасоодо шафран жип, ак трюфель, мадагаскар ванили жана сырдуу ингредиент колдонулган. Ошондой эле анын сырты 23 карат алтын менен капталган.
The Portugal News басылмасынын жазышынча, Даниэль Гомеш момпосуйду жасоо үчүн бир жыл убакыт короткон. Гомеш мындай шоколаддан болгону 1000 даана гана жасап, аны сапаттуу жыгачтан жасалып, сырты Swarovski кристаллдары менен кооздолгон кутуга салган.
Өзгөчө жасалган момпосуйлар Бириккен Араб Эмирлигине, Анголага, Аргентинага жана Россияга жөнөтүлгөн.