БИШКЕК, 19-мар. — Sputnik. Россиянын президенти Владимир Путин Крым менен Россиянын биригишинин урматына арналган концертте 18-марттагы шайлоодо ага добуш бергендерге ыраазычылык билдирди.
Учурдагы президент башка атаандаштарынан бир топ эле алдыда келе жатат. Борбордук шайлоо комиссиясынын алдын ала жыйынтыгы боюнча протоколдордун 40 пайызы эсептелип, Путин 74,22 пайыз менен алдыда.
"Рахмат, жыйынтык үчүн рахмат", — деди Путин.
Ал өз сөзүндө келечек тууралуу ойлонууга чакырды.
"Мамлекетибиздин, балдарыбыздын келечегин ойлошубуз керек. Ошондо гана биз ийгиликке жете алабыз", — деди президент.
Президенттикке сегиз киши талапкер болгон. Алар: Сергей Бабурин, Павел Грудинин, Владимир Жириновский, Владимир Путин (азыркы президент), Ксения Собчак, Максим Сурайкин, Борис Титов жана Григорий Явлинский.
Россияда болгон президенттик шайлоого Кыргызстанда жашап жаткан РФ жарандары кандай катышканын видеодон көрүңүз.