БИШКЕК, 16-мар. — Sputnik. Премьер-министр Сапар Исаков Коопсуз жана туруктуу транспортунун Чыгыш альянсы уюмунун директору Эмма Мак Леннан менен жолугуп, анда Кыргызстандагы жол коопсуздугун жогорулатуу талкууланды. Бул туурасында өкмөттүн маалымат кызматынан кабарлашты.
Жолугушууга Улуу Британия Бириккен королдугунун жана Түндүк Ирландиянын Кыргызстандагы ыйгарым укуктуу элчиси Робин Орд-Смит да катышты.
"Премьер-министр ошондой эле өкүнүү менен белгилегендей, өкмөт "Акылдуу шаар" долбоору боюнча инвесторлор менен болгон келишимден чыгууга аргасыз болду, буга байланыштуу долбоорду мындан ары өз күчү менен ишке ашырууну пландаштырууда", — деп жазылган маалыматта.
EASST директору Эмма Мак Леннандын айтымында, КРдин Ички иштер министрлигинин Жол кыймылы коопсуздугун камсыздоо боюнча башкы башкармалыгынын жетекчилиги менен аталган маселе боюнча учурдагы абалды талдоо жана сунуштарды иштеп чыгуу боюнча жолугушуу өткөрүлгөн.
Анын пикиринде, биринчи кезекте иштин артыкчылыктарын белгилеп, Бишкек шаарындагы кооптуу деп саналган кесилиштерди аныктоо зарыл. Ал маалымдагандай, EASST тарабынан талдоонун жыйынтыгында "Акылдуу шаар" долбоорун ишке ашыруу боюнча тийиштүү сунуштамалар берилет.
Улуу Британиянын Кыргызстандагы Элчиси Робин Орд-Смиттин айтымында, EASST – көз карандысыз уюм жана дүйнөнүн 14 өлкөсүндө ийгиликтүү иш алып барууда. Аталган уюм жалпысынан жол жана жүргүнчүлөрдүн коопсуздугу маселесине адистешкен.
"Акылдуу шаар" — өлкө жолдоруна видеокамералар орнотула турган система буга чейин кытайдын Huawei компаниясы менен ишке аша турган болуп, бирок өкмөт мындан бир нече күн мурда ал келишимден чыгууну чечкен.