БИШКЕК, 12-мар. — Sputnik. Дакка — Катманду багыты боюнча учкан Бангладештин US-Bangla авиакомпаниясынын учагы Непалда кулап, кеминде 39 киши каза болгонун РИА Новости агенттиги өлкөнүн полициясына таянуу менен билдирди.
"31 жүргүнчүнү куткарып, ооруканага жибердик. Сегиз киши ооруканада каза болду. Дагы 31 жүргүнчүнүн сөөгү учактан чыгарылды", — деп айтылат полициянын маалыматында.
Учак Катмандунун эл аралык аэропортуна конуп жатканда учуп-конуу тилкесине эмес, аэропорттун жанындагы футбол аянтчасына түшкөн. Учак жерге урунгандан кийин жалын чыгып, куткаруучулар тартылган.
Учурда каза болгон жарандардын аты-жөнү такталууда.
Буга чейин Россиянын Подмосковье аймагында болгон авиакырсык видеокөзөмөлгө түшүп калган.