Аялы күйөөсүнүн кыжырын кайсы учурда кайнатат? Sputnik Кыргызстан агенттиги үйлөнгөн мырзалардан сураштырып көрдү.
Шашпагандар. "Кечки саат алтыда конокко барабыз" десе кээ бири так ошол алтыда сулуулук салонунда шашпай отурган болот. Урматтуу аялзаты, билебиз, дайыма сулуу, жарашыктуу жүрүшүңөр керек. Бирок бир-эки саат эртерээк даярданып койгулачы, сураныч! Урушпайын десең да уруштурасыңар.
Жөнү жок чала бергендер. Жумуштан кичине кечиксең же досторуң менен анда-санда бир жолуксаң "качан келесиң" деп чала берген келинчектер да кыжырга тиет. Айрыкча кызматта олуттуу кишилер менен сүйлөшүп жатканда жанды койбой чала беришет. Анан айла жок алсаң "жумуштасыңбы" деген жөнү жок суроону бергенде күйбөгөн жериң күл болот да.
Эптеп-септеп тамак жасагандар. Көңүлү жок жасаган тамак дароо эле билинет. Эркек ашказаны менен сүйөт эмеспи. Андыктан эч нерсе кылбасаңар да даамдуураак тамак жасап койгулачы.
Айылчылар. "Бүгүн курбулар менен жолугабыз, эртең апамдын туулган күнү" деп конок дегенде ичкен ашын жерге таштаган айылчы аялдар да кууратат. Үй жыйналуу эмес же тамак жок, анан акча эле сурап турушат.
Кайын-журтун "жек көргөндөр". "Сенин туугандарың минтип, апаң антип салды" деп жумурткадан кыр издеп, туугандарыңды желмогуздай көргөн жубайлар аман эле болсун.
Төркүнү жакындар. Ооздон жел чыга электе ата-энесине, төркүнүнө чуркаган "эрке" келинчектер да кыжырга тиет. Ага кол көтөрүп, катуу айтпасаң деле ар кайсы шылтоону айтып кеткендерди биротоло төркүнүнө жөнөткүң келет да.