БИШКЕК, 10-мар. — Sputnik. Киши өлтүрүүгө шектелип эки адам кармалганын Бишкек ШИИБдин маалымат кызматынын жетекчиси Адыл Оморов билдирди.
Буга чейин 3-март күнү Чоң Чүй каналынын жанынан бычакталып мууздалган жигиттин сөөгү табылган.
“Иликтөө иштеринин натыйжасында шектүүлөр 8-мартта колго түшүрүлдү. Тергөө алардын маркум менен тааныш экенин, ортодогу пикир келишпестик мушташка айланып кеткенин аныктады”, — деди Оморов.
Кармалгандар 18 жана 19 жаштагы жаш балдар экени маалымдалды.